Marzo 10, 2004

Presentase'l nueu estudiu sociollingüísticu

El mes pasau presentose n'Uviéu el segundu estudiu sociollingüísticu de la manu de Francisco Llera Ramo y Pablo San Martín Antuña sociologos de prestixu que xuntu cola Academia de la Llingua asoleyan esti trabayu baxu'l nome de "II Estudiu Sociollingüísticu d'Asturies". Nesti trabayu hai dellos datos que muestren la salú y los pelligros de la nuesa llingua. Ente ellos destaquen el perimportante avieyamientu de los falantes lo que fae que de 10 años p'equí nun se renueve'l númberu de falantes lo que puee debese de xuru al saltu interxeneracional pol que nun s'algama a tresmitir la conocencia la llingua dende los falantes vieyos a los rapacinos.
Otru datu perimportante ye la opinión de la xente respeutu a la oficialidá. Destaca la mayoría d'asturianos qu'apuesten pol billingüísmu y pola mayor presencia del asturianu tantu nos medios de comunicación como nes escueles. A esto Llera Ramo culpó a les polítiques o más bien a la falta de polítiques dende'l gobiernu asturianu con respeutu a la normalización y promoción del idioma, a lo que soralló la importancia de fomentar la enseñanza del asturianu nos adultos.
Ye destacable tamién l'interés de los asturianos pola nueva TV autonomica na que segun l'estudiu ye precisu incluyír conteníos n'asturianu.

Escritu por Alderique a les 10:06 PM | Comentarios (3)

La llarga manu d'ETA: o como'l PP fae del terrorismu escusa pa tou...

Estos díes ente promeses, mitines y debates televisaos...uy non, eso non, bono qu'estos díes además de tou esu salta a la palestra la noticia más acoyonante y babayona de toes les que sentí caberamente. Ta nidiu que'l PP suel emplegar el tema del terrorismu p'algamar votos y que nun tien reparu nin escrupulos dacuandu se-yos presenta ocasion d'aprovechalu (vease casu Carod-Rovira). Pos bien agora resulta que sigún el PP de L.lena, el nueu reglamentu d'usu de la llingua nel conceyu ye propiu d'ETA, vaya qu'a Otegui nun-y basta con reivindicar les 3 provincies vasques, Navarra y el pais vascu frances, qu'agora sigun el PP van venir meter manu en L.lena. ¿Sedrá esti el xermen del surdimientu d'un movimientu independentista de L.lena?¿ye'l portavoz poppular un futurologu que presiente l'apaición d¡un garrapiellu suicides que s'inmolen na casa conceyu pa reivindicar el drechu al autodetermín del conceyu de L.lena?

Na, dexandonos de coñes, ye ablucante como'l Partíu Popular puee enmierdar tantu les coses, vendenos la diversidá cultural d'España como amenaces de terrorismu y separatismu. Nestos díes o se ta col Partíu Popular y la so España "una, grande y libre" o ya yes un separatista o en su defeutu un que pauta con separatistes (eso dacuandu nun te llamen asesín...). ¿Ye la llingua un tesoru que namas tienen los nacionaliegos?¿ye tan estrañu que los non nacionaliegos, seyamos asturianos o non, trabayemos y vindiquemos la diversidá y la pluralidá d'España ensin tener que llevar armes nin pedir la dixebra? El casu de L.lena nun ye más que la babayada que'l PP col so nacionalismu español pero llevada a pequeña escala.
Dende equí recomenda-y al paisanin esi del PP de L.lena que viaxe fuera d'España o que s'empape de les diferentes cultures que constituyen España, que non tou son toros y sevillanes.

Escritu por Alderique a les 09:52 PM | Comentarios (1)