Esti añu'l llugar escoyíu pola Academia de la Llingua Asturiana pala cellebración del Día de les Lletres Asturianes ye Avilés. El prósimu vienres 7 de mayu, a les 8 la tarde na Casa la Cultura d'Avilés cellebrarase l'actu solemne nel que la presidenta Ana Cano lleera'l discursu institucional y amás va tomar posesión l'académicu D. José Antonio Fernández Vior.
Dempués actuará'l grupu folk Corquieu, y finarase con una espicha popular con música y bailles del país na carpa instalada delantre la Casa Cultura con sofitu de la Xunta pola Defensa de la Llingua Asturiana.
Hai que recordar tamién qu'enantes d'estos actos, a les 7, cellebrarase la tradicional manifestación pola oficialidá na que la xente asturianista vindicaremos la oficialidá de la llingua.
De la manu de Próspero Morán, conocíu periodista de prestixu n'Asturies ñaz Asturnews.com, un diariu dafechamente n'asturianu nel que s'espublizarán tou tipu de noticies de carauter xeneral pero col denominaor común de ser n'asturianu. El diariu vien protexíu con llicencia copyleft ye dicir que pueen copiase tolos testos y noticies siempre y cuandu se nombre d'ú se sacaron. Estu nun tien otra finalidá que la difusión na rede d'articulos na nuesa llingua con un ciertu carauter periodisticu y sobre tou con amplia información sobre les noticies del país, amás d'articulos d'opinión, axenda cultural que puees suscribite pa que te llegue al to buzon de correu lletrónicu y un relatu encadenau escritu por importantes figures de la lliteratura actual asturiano. Amás dende esti nueu proyeutu pretende afondase na utilización de les nueves tenoloxíes na normalización de la llingua polo que tien accesu tamién a les noticies dende'l movil y tien la capacidá de poder enxertase comentarios a les noticies o d'unviales a un collaciu. En definitives cuentes, una bona noticia palos que trabayamos pola normalización de la nuesa llingua porque con estes coses ye colo que se llega a la xente. A ver si hai más xente que s'anima a facer proyeutos asina.
Les coses camuden pocu a pocu y tamién va camudando la xente que trés 8 años d'aznarismu paez que-y entra la gayolera col nueu vuelcu elleitoral y en consecuencia col nueu gobiernu español. Nel debate d'investidura viose nidiu un cambiu de talante, otres formes y sobre tou, un respetu a les diferentes fuercies politiques sobre tou a les minoríes. Una cosa foi la que más mos tuvo que llamar l'atención a los que sofitamos l'asturianismu seya o non nacionaliegu. La noticia de que diba abrise camín pales reformes de los estatutos foi ensín duldes daqué que mos prestó asgaya a toos, una esperanza de facer medrar el país y tamién una forma de cohesión social (como dixo Zapatero nun mitin: "facer un país nel que quepamos toos").
El momentu ye perimportante p'Asturies. Con el Gobiernu del Principau del mesmu collor que'l de Madrid les coses podríen ser perfáciles y productives. Ye'l momentu de vindicar temes como la capacidá de disolver la Xunta Xeneral dacuandu seya necesariu y non dacuandu seya obligau, sofitar el procesu de cooficialidá de la nuesa llingua (y de la fala na zona d'entrambasaguas), la posibilidá de crear un cuerpu autonómicu de policía, l'afondamientu nes competencies, etc. Son temes que nun se faen nun añu nin en dos, pero qu'hai qu'entamar pa camudar Asturies, pa facela del sieglu XXI y pa dir pocu a pocu equiparandola coles demás autonomíes.
La cohesíon social ye la base pala vertebración del país y fasta que nun se faiga casu a les vindicaciones de la sociedá, al pensar popular, la cohesión y la paz social nun va llegar. Faigamos d'esti momentu un puntu y aparte col qu'algamar un país nel que quepamos toos, nacionaliegos y non nacionaliegos, nel proyeutu federal y plurinacional que tantu prediquen en Madrid. La pena ye que dende'l nuesu Gobiernu autonomicu nun se vaya facer un res nesi tarrén y que tengamos que quedar a veles venir como tamos acostumbraos.
Enllaces recomendaos:
+ Entrevista na cadena SER a Eduardo Madina, diputau del PSOE y Secretariu Xeneral de les Mocedaes Socialistes d'Euskadi (Recomendau por ser del tipu xente que fae falta nel PSOE)
+ Discursu d'investidura de Zapatro nel que fae referencia a les cuestiones autonómiques.